قالت لي خاچية…

قالت لي خاچية وهي تمسح الغبار عن عتبة بيتها:
“لن أرشّحك إلا إذا…”

البروفسور د.ضياء واجد المهندس
رئيس مجلس الخبراء العراقي

قلت لها: خير إن شاء الله، شنو هالطلبات؟

قالت:

1. لا أريد أن أرى صورتك معلقة بكل عمود وسياج مع صور الحرامية، كافي وجوه تبتسم إلنا قبل الانتخابات وتكفخنا بعدها!

2. خفّض رواتب الرئاسات والوزراء للنصف، ترى نصهم نايمين والنص الثاني مسافرين، نشوفهم وقت الانتخابات ينصبون علينا!

3. امنع المنافع والتخصيصات، خليهم يعيشون مثل خلق الله، يعرفون طعم الراتب آخر الشهر ، مو الرئيس النايم راتبه 100 مليون دينار وصارف على سفراته 117 مليار دينار و كاتب مذكرات أحلامه الرئاسية ب 9 مليار دينار والمتقاعد الخادم الدولة 40 سنة يأخذ 500 الف دينار .

4. زيد رواتب المتقاعدين وذوي الرعاية، تعبوا عمرهم مو حتى ينطوهم كارت تموينية بنص زيت!

5. وفر شغل للبطّالين، مو كل يوم “مبادرة” وراها صورة وهاشتاك ما نريد كلاوات رئاسية .

6. وحاسب الحرامية، كافي شعار “ماكو خط أحمر” وهم يبيعون الدولة بالمزاد، و راحو يبيعون اهدومنة العلينة !

وقبل أن تكمل، قلت لها:
على كيفك خاجية… تريديني أگلب العراق گلاب؟
ترى الحيتان والضباع والذباب و الثعالب و الذئاب كلهم صاروا مسؤولين!

لكن خاجية ضحكت وقالت:
“إي حبيبي، إذا ما تگلبه، لا تترشح… خلي الكلاب القديمة تلعب وحدها، تعودنة علة عضها ، و شلون تمص دمنا!”

وهكذا انتهى الحوار الانتخابي الوحيد الصادق في العراق.

البروفسور د.ضياء واجد المهندس
رئيس مجلس الخبراء العراقي
مرشح مستقل
قائمة البديل (250)
تسلسل 9
الناس ما تريد وعود جديدة، تريد نظافة قديمة!